Үрүҥ Тунах ыһыах түһүлгэтин тэрээһиннэриттэн

       Үрүҥ Тунах ыһыаҕынан! Күндээрэр халлаан күнүн уота чаҕылыйда, күн сирин дьоно сайын кэлбитин уруйдаата.Эҕэрдэлээх ыһыах ыһылынна, уйгулаах түһүлгэ олохтонно, ылбаҕай ырыа ылланна, лыҥкынас хомус дьүрүлээтэ, түмсүүлээх оһуохай этилиннэ, хомоҕой хоһоон хоһулунна. Сахабыт сиригэр Үлэ сылын бэлиэтээн Үрэн Хоһуун дойдутун Өлөөн үлэһит дьонун, үлэһит династицияларын ытыктаан, чиэстээн Өлөөннөөҕү бибилэтиэкэ үлэһитэ Карпова Мария Николаевна   “Төрөөбүт төрүт тылбынан хоһуйабын”   түөлбэнэн хоһоон куонкуруһу ыытта. Түөлбэттэн улаханныын — кыралыын  саха поэттарын хоһооннорун биирдии кыттааччылаах, бөлөҕүнэн да литературнай монтаж оҥорон хоһоон ааҕан күөн көрүстүлэр. Саамай аҕа саастаах хоһоон ааҕааччыбыт Долгунова Любовь Васильевна “Үлэ күннэрэ” Эллэй хоһоонунан күрэҕи арыйда. Хас биирдии түөлбэ түмсүүлээхтик хомоҕой хоһооннору ааҕан кытыннылар.

      Ол кэнниттэн өбүгэ саҕаттан утумнаан кэлбит, оһуор – ойуу киэргэллээх саха таҥаһыгар “Ыһыаҕым саргылаах таҥаһа” аһаҕас күөн күрэс ыытыллынна. Күрэҕи иилээн саҕалаан ыыттылар Өлөөннөөҕү библиотечнай ситим  үлэһиттэрэ: Артамонова Прасковья Алексеевна главнай библиотекарь – комплектатор, Иванова Сардана Вадимовна Өлөөннөөҕү оройуоннай бибилэтиэкэ ведущай технолога. Куонкуруска  кытынныллар ис дууһаларыттан, айылҕаттан бэриллибит иис абылаҥар уйдарбыт  Өлөөннөөҕү бытовой комбинат ытыктанар үлэһиттэрэ  Николаева Сусанна Афанасьевна оҕолоругар, сиэннэригэр тикпит дьэрэкээн таҥастарын сиэннэрэ түһүлгэ устун хааман көрөөччүлэр дьүүллэригэр көрдөрдүлэр. Өр сылларга бытовой комбинатка үлэлээбит аҕа саастаах, иис абылаҥа аргыстаах үлэ бэтэрээнэ Павлова Ибаррура Кононовна талба сахалыы мөссүөннээх таҥастарын түөлбэтин олохтоохторо көрдөрдүлэр. Ону таһынан эдэр ийэлэр күөн көрсөн тикпит сахалыы таҥастарын Ушманова Екатерина Васильевна, норуот маастара Сергеева Ия Яковлевна үлэлэрин дьон – сэргэ сэҥээрэн көрдүлэр. Эдэр ыччаттар ыккардыларыгар кэскиллээх, иис абылаҥар уһуйуллубут кыргыттарбыт бааллара олус үөрдэр. Эдэр ыал ийэтэ Христофорова Марианна Николаевна бэйэтэ тикпит сахалыы таҥастарын дьиэ кэргэнинээн көрдөрдө. Бэһис түөлбэ олохтоохторо дьиэ кэргэттэринээн сахалыы таҥастаах өбүгэлэрбит таҥастарын аныгылыы тупсаран, ойуулаан – бичиктээн, оһуордаан – мандардаан тиктэн  намыын хаамыылаах түһүлгэ устун хааман  таҥастар быыстапкаларын көрдөрдүлэр. Икки түһүмэх куонкурустарбытын  дьүүллүүр сүбэ хамыыһыйата  библиотека үлэһиттэрэ Семенова Наталья Денисовна Өлөөннөөҕү оройуоннай бибилэтиэкэ ведущай бибилэтиэкэрэ, Өлөөннөөҕү оҕо модельнай бибилэтиэкэ ведущай бибилэтиэкэрэ Петрова Марианна Геннадиевна эппиэтнэстээхтик үлэлээтилэр.

    Инники да буолар ыһыахтарга иис абылаҥар уйдарбыт кэрэ аҥардардарбыт нарын араас мөһүөннээх сахалыы таҥастарын өссө да сэҥээрэ көрө туруохпут буоллаҕа.

                                                                                    Мария Карпова