Быйыл биһиги оройуоммут ытыктанар, убаастанар үс биир дойдулаахтарбыт үбүлүөйдээх сылын бэлиэтээбиппит. Олортон биирдэстэрэ Христофоров Василий Афанасьевич ыам ыйын 13 күнүгэр 85 сааһын бэлиэтээбитэ. “Илкит” сынньалаҥ кииҥҥэ өрөгөйдөөх сааһын бэлиэтээн улахан тэрээһин ыытыллыбыта. Ол күн “Христофоров Василий Афанасьевич кинигэтин долбуура” диэн кинигэлэрин быыстапката туруоруллубута. Кииннэммит библиотека директора Николаева Екатерина Васильевна киэҥ эйгэҕэ  видеопрезентациялаах Василий Афанасьевич кинигэлэрин туһунан иһитиннэрии оҥорбута.

       Василий Афанасьевич – үлэ бэтэрээнэ, Саха Өрөспүүбүлүкэтин үтүөлээх ветеринарнай бырааһа. Ветеринээр идэтинэн төрөөбүт дойдутугар 40 тан тахса сыл ветеринээринэн, Өлөөннөөҕү  ветеринаарнай станция, управления начаалынньыгынан, Өлөөн оройуонун кылаабынай ветеринаарнай бырааһынан үлэлээбитэ. Кини “Максимка”, “Өлөөн удьуор табаһыттара”, “Өлөөн оройуонун ветеринарай сулууспата”, “Өлөөн оройуонун табаны иитэр биригээдэлэригэр зооветеринарнай уонна хаһаайыстыбаннай үлэлэри ыытыыга сүбэлэр”, “Өлөөн чулуу-бастыҥ дьоно”, “Өлөөн удьуор табаһыттара”, “70-нус хаарынан уулларбыт Саха Республикатын үтүөлээх бырааһа”, “Передоые люди Земли Урэн Хосууна, Урэн Хоһуун дойдутун Бастын дьоно” кинигэлэр ааптардара.

     2023 сыл Саха сиригэр Үлэ сылынан биллэриллибитэ. Ол чэрчитинэн оҕо бибилэтиэкэтин лааҕырын иитиллээччилэрэ тэрилтэлэринэн экскурцияҕа сылдьан араас идэлээх дьону көрсүбүттэрэ. Тэрилтэ үлэһиттэрэ оҕолору интириэһиргэтэн идэлэрин туһунан  билиһиннэрбиттэрэ олус кэрэхсэбиллээх. Биир интириэһинэй тэрээһиннэрэ буолла ааптары кытта көрсүһүү.Оҕо модельнай бибилэтиэкэтигэр лааҕыр иитиллээччилэрэ олохтоох аҕыс кинигэ ааптарын кытта Василий Афанасьевтыын  интириэһинэй көрсүһүү буолан ааспыта. Эдэр көлүөнэ оҕолоругар Өлөөммүт хайдах төрүттэммитин, Өлөөн оройуонун төрүттээбит  Винокуров Илья Егорович уонна Суслов Иннокентий Михайлович тустарынан хаартыскалаах альбомнай кинигэ буолан тахсыахтаах үлэтин көрдөрөн сиһилии кэпсээн иһитиннэрэн интириэһиргэттэ. Төрүт олохтоох киһибит бэйэтин олоҕун, ветеринар идэтигэр үөрэммит устудьуоннаабыт кэмнэрин, эдэр үрдүк үөрэхтээх  испэсэлиис буолан төрөөбүт дойдутугар үлэтин саҕалаабытын сиһилии кэпсээбитэ. Бибилэтиэкэ эдэр  ааҕааччыларыгар үөрэхтээх, киэҥ билиилээх дьон буола улааталларыгар баҕа санааларынан эттэ. Көрсүһүү ыҥырыылаах ыалдьыттыын уопсай хаартыска түһүүтүнэн түмүктэннэ.

                                                                Мария Карпова