Олус кэрэ дойдубар

Олус кэрэ дойдубар


Олус кэрэ дойдубар
Үөрэ-көтө олорор,
Айылҕалыын силбэһэр
Тулам миэнэ умсулҕан.

Төгүрүйэ тэнийэр
Очуос хайа эркинэ,
Холкутуйан, налыйан
Эбэ уута субуллар.

Маннык үтүө дойдубар
Төрөөн-ууһаан аастылар,
Өбүгэбит уустара,
Ытык саастаах дьоннорбут.

Ыарахантан чаҕыйбат
Үлэ үөһүн туппуттар,
Табаһыттар, булчуттар
Бастыҥ ааты сүкпүттэр.

Үйэлэрин уһатан
Ахтан-санаан тураммыт,
Ыччаттара сурукка
Тиһэн тиэрдиэх тустаахпыт.

Остуоруйа туһунан
Кэлэр кэскил билиэхтээх,
Кэстибэккэ тирэхтээх
Дойдум сирэ сайдыахтаах.


Розалия Павлова
Өлөөн
05.01.2023