Заголовок:

Сибэкки ыһыаҕар түбэстим

Заметка:
Сибэкки ыһыаҕар түбэстим

Сибэкки хонуубар дьаарбайдым,
Сөҕүмэр дьиктини мин көрдүм,
Сибэкки ыһыаҕар түбэстим,
Сиэттиһэн үҥкүүгэ дайыстым.

Сибэкки барахсан киэргэтэр,
Сиэдэрэй баайынан байытар,
Сибиэһэй салгыҥҥа уйдарар
Сып-сырдык эйгэҕэ тиксэрэр.

Сибэтиэй айылҕа көстүүтэ,
Силистээх айыыбыт биһигэ,
Сүрэхпэр тапталы иҥэрэр, 
Сипсиһэн иэйиибин сэҥээрэр.

Сүрэҕим мүөтүнэн туймаарда,
Симиктик дууһабын таарыйда,
Сүүһүнэн ырыабыт тылынна,
Сибэкки ыһыаҕар ылланна.

Сарсыҥҥы олохпут уйгутун
Солбуллар үйэтин уһатан,
Ситими өҥ буортан быспаккын,
Саҥаттан һайбайа үүнэҕин.

Сибэкки хонуутун алгыһа
Сайыммыт тулатын арыала,
Сүүһүнэн сылларга айхаллыыр,
Сирдээҕи дьолунан ситэрэр.


Розалия Павлова
Өлөөн