Заголовок:
Тиит барахсан

Заметка:
Бу тиитим барахсан,
Бээ, туохтан санньыйан,
Эрийэ бардаҕай?
Иҥнэри сыттаҕай?

Санаатын уйбакка
Хомойон, сүөм түстэ?
Ыарыыта оспокко
Ыксары ылларда?

Аттыгар доҕоро
Аһыйан турара,
Мөлтөөбүт көрүҥэ
Харахпар билиннэ.

Харааста оҕото
Ытаахтыы тардыһа,
Ийэтин бигиирэ
Сүрэхпин таарыйда.

Айылҕа кэҕиннэ,
Тиит маһым бэриннэ,
Уйатын тулата
Тумаҥҥа туймаарда.
 
Оо, тоҕо абатай,
Тыынара тохтоото,
Бүтүн тыа иһийдэ,
Көтөр кыыл чуумпурда.

Аһыытын үллэстэ
Халлааммыт ууланна,
Тыалыран таһыйда,
Ардаҕын түһэрдэ.

Бу көстүү иэдээнэ
Киһини долгутар,
Үүнээйи дьылҕатын
Харыстыах, доҕоттор.


Розалия Павлова
Өлөөн
26.11.2020с.