Заголовок:
Сахабыт ыһыаҕар..

Заметка:
Самаан сайыҥҥа, бэс ыйыгар,
Аар Айыыларга сүгүрүйэр,
Күнү көрсүү сиэрин толорор 
Үрүҥ тунах ыһыах ыһыллар.

Түһүлгэ аһаҕас биһигэр
Чэчирии  салама симэнэр,
Алгысчыт алгыһын көтөҕөр,
Аал уотун иччитин күндүлүүр.

Урааҥхай саха айхалланар,
Уһуур үйэтэ уруйданар,
Үйэлээх олоҕу баҕарар
Баҕата барҕара алҕанар.

Күүстээх - уохтаах бөҕө санныгар,
Сытыы өйдөөх чөл мэйиитигэр,
Төлкөтүн төрдүтэ холбоһор,
Утумун ситимэ салҕанар.

Сахалыы тыыммыт чэлгийэ сайдар,
Сыал-сорук дьулуруччу туолар,
Сахабыт үгэһин тэнитэр,
Куйаары тэлэйэ көтүтэр.

Кырдьаҕас эмэнниин киирсиһэр
Оһуохай күрэҕэр күөн көрсөр,
Айылҕалыын үөрэ алтыһар
Дьоллоох түгэнэ түстэнэр.

Олоҥхоһут олоҥхолоон     туойар,
Сэргэстэһэр санаата ханар,
Симэлийбэт номоҕу тиэрдэр,
Сиһилии ойуулаан тойуктуур.

Илии-атах тутуһан оонньуур
Чиргэл  иҥиир быстар күрэҕэр
Аакка тиксэр кыайыыны чиэстиир
Ыһыы-хаһыы тула ньиргийэр.

Бу курдук салаллар
Сахабыт ыһыаҕа,
Үрүҥ күн анныгар,
Буор сирин тэллэҕэр,
Сэлиинэн айанныыр
Үрүҥ ат үрдүгэр,
Доргуччу этиллэр
Бэргэн тыл күүһүгэр!


Розалия Павлова

Өлөөн
15.06.2020с.